Як сцвярджае старшы эксперт міжраённага аддзела Дзяржаўнага камітэта судовых экспертыз маёр юстыцыі Алеся Міклашэвіч, у яе рабоце галоўнае — мэтанакіраванасць.

У свой час дзяўчына пасля заканчэння СШ №1 імя ЧБВА г. Пружаны свядома выбрала свой шлях менавіта ў гэту службу. Таму і лічыць, што першую падтрымку пры паступленні на следча-экспертны факультэт Акадэміі МУС РБ акажа менавіта мэтанакіраванасць, якая потым дапаможа і ў працы. А ў дадатак, як зазначае Алеся Аляксандраўна, якая ўжо амаль дзевяць гадоў працуе ў экспертным аддзеле, спатрэбіцца матэматыка, у прыватнасці, геаметрыя. Вывучэнне слядоў, адбіткаў пальцаў па лініях малюнка, правядзенне іншых трасалагічных экспертыз…

Дзейнасць судовых экспертаў шматбаковая і не заўсёды «кабінетная». Спецыялісты міжраённага аддзела прымаюць удзел у правядзенні следчых дзеянняў. Для выезду яны бяруць з сабой сапраўдную міні-лабараторыю, якая змяшчаецца ў куфры. З дапамогай розных прыстасаванняў дакладна вывучаюць месца здарэння, якое, на першы погляд, уяўляе загадку. Але толькі не для вачэй спецыялістаў. Як расказвае Алеся Міклашэвіч, у сваёй практыцы яна нямала разгадала розных загадак.

— Нядаўна давялося вывучаць месца крадзяжу рэчаў з нежылога дома, — успамінае судовы эксперт. — Пацярпелы апошні раз пабываў на дачы ажно ў верасні, а звярнуўся да праваахоўнікаў у лютым бягучага года. І за гэтыя амаль паўгода яго абрабавалі невядомыя злодзеі.

Здаецца, няўмольны час не пакінуў ніякіх шанцаў для судовых экспертаў, але і не з такой загадкай яны спраўляліся. Пры вывучэнні мясцовасці даследчыкі знайшлі след абутку, і належаў ён не гаспадарам. Адбітак быў дасканала вывучаны, выяўлены ўсе яго асаблівасці, на якія і была скіравана ўвага міліцыянераў. У далейшым пошуку яны знайшлі злодзея, які не змог абвергнуць доказы і прызнаўся, куды падзеў украдзенае.

І такіх прыкладаў нямала, што робіць службу судовых эспертаў вельмі цікавай. А яшчэ і карыснай для грамадства.

---

Источник информации: «Раенныя будні»