Начальнік упраўлення Дзяржаўнага камітэта судовых экспертыз па Магілёўскай вобласці палкоўнік юстыцыі Яраслаў Федарынчык, кіраўніцтва і работнікі Бялыніцкага міжраённага аддзела ДКСЭ прынялі ўдзел ва ўсебеларускай патрыятычнай акцыі "Мы – грамадзяне Беларусі", прысвечанай Дню Канстытуцыі Рэспублікі Беларусь.
У гэты дзень па ўсёй краіне прадстаўнікі ўлады, аўтарытэтныя і заслужаныя людзі ўрачыста ўручалі пашпарты грамадзяніна Рэспублікі Беларусь юнакам і дзяўчатам, якія дасягнулі 14-ці гадоў. У г.Бялынічы ўдзельнікаў і гасцей мерапрыемства сабрала зала раённага Цэнтра культуры. Яраслаў Федарынчык адным з першых узняўся на сцэну, каб павіншаваць усіх з Днём Канстытуцыі, а асабліва юнакоў і дзяўчат, якія хваляваліся ў прадчуванні важнай у іх жыцці падзеі.
– Атрымаўшы сёння пашпарт, вы становіцеся паўнапраўнымі грамадзянамі Рэспублікі Беларусь з усімі прапісанымі ў Канстытуцыі правамі і абавязкамі, – адзначыў у сваёй прамове Яраслаў Федарынчык. – Жадаю вам быць сапраўднымі патрыётамі сваёй краіны, сумленна працаваць на яе развіццё, дасягаць поспехаў у розных сферах жыцця.
Акрамя пашпартоў 14-гадовым хлопцам і дзяўчатам, сярод якіх былі і дзеці работнікаў ДКСЭ, уручылі Канстытуцыю Рэспублікі Беларусь і кнігу аб нашай краіне. У сваю чаргу навучэнцы прамовілі словы клятвы: «Мы добра разумеем, што ад нашага пакалення залежыць будучыня краіны. Прымаючы на сябе ганаровае званне грамадзян Беларусі, мы клянемся сваёй вучобай, сваёй працай і сваімі справамі ўмацоўваць аўтарытэт і добрае імя сваёй краіны. Мы клянемся быць вартымі памяці дзядоў і прадзедаў, якія аддалі свае жыцці за гонар і незалежнасць нашай Радзімы».
Працягвалася мерапрыемства святочным канцэртам, у якім прагучала нямала кранальных песень пра самае дарагое для кожнага беларуса. Напрыканцы юным удзельнікам свята ўручылі салодкі падарунак ад упраўлення ДКСЭ па Магілёўскай вобласці.
– Вельмі прыемна, што ў гэты святочны дзень я атрымліваю дакумент, які сведчыць маю асобу і тое, што я з'яўляюся грамадзянінам Рэспублікі Беларусь. Гэты дзень стане вельмі значным і запамінальным для мяне, – падзялілася ўражаннямі 14-гадовая вучаніца Кацярына Мазакова.
– Я вельмі рада, што ў такі дзень – Дзень Канстытуцыі Беларусі – я атрымала такі важны для чалавека дакумент – пашпарт, – дадала Аліна Губіч. – Я ганаруся тым, што я грамадзянка Рэспублікі Беларусь.
Ірына Рачкоўская, афіцыйны прадстаўнік УДКСЭ па Магілёўскай вобласці
